ليه Barefoot Mai؟

ليه Barefoot Mai؟ 



من سنة واحدة بالظبط أنا مكنش ليا لا في المطبخ ولا الطبيخ، كبيري إني بحب جدا ألوان أدوات الطبخ وأحب اشتري حاجات جديدة للمطبخ.
وبحكم إني اتجوزت اضطريت أعرف إزاي أعمل أكل حلو ليا ولزوجي، بالصدفة أنا وأحمد -زوجي- ذواقين جدا في الأكل ومش أي أكل يعجبنا، وبالتالي مكانش المهم أعمل أكل معقد المهم يكون طعمه حلو وإلا هنصوم.
بدأت حياتنا الزوجية أنا وأحمد بشهر عسل في إيطاليا - ميلانو وبحكم وجود فرع من العيلة إيطالي الجنسية شفنا ودقنا أكلات مكناش نعرف عنها حاجة، وبعدها بدأنا نكتشف حاجات جديدة في عالم الأكل والاختيارات المختلفة اللي مكناش نعرفها، في الآخر برضه محدش يقدر ينكر إن معظم المطبخ المصري عبارة عن دمعة وفيه أشكال مختلفة من الخضار لكن كله بيتعمل بنفس الشكل، وأنا اتعقدت من الدمعة وزهقت منها الصراحة.
في إيطاليا ملقتش دمعة خالص، وده كان اكتشاف في حد ذاته.
المهم، رجعنا وبدأت تجاربي أنا في المطبخ وبدأت بأكلات عادية خالص زي مكرونة اسباجيتي، بانيه، الحاجات المعتادة دي، لحد ما بدأت اشوف Applications كتير للطبيخ على الموبايل وأجرب حاجات كتير منها، وفيه حاجات كتير اترمت بسببها.
الصدفة البحتة كمان هي اللي دلتني على عبقرية المطبخ أينا جارتن Ina Garten صاحبة البرنامج الشهير واللي بقاله أكتر من ٤٠ سنة Barefoot Contessa، الست دي ليها الفضل إني عملت حاجات تحفة الناس مكانتش مصدقة اني أنا اللي عملاها..  أنا اللي مكنتش بشيل كوباية في بيتنا!
من التريكات بتاعة أينا مثلا إن فطيرة البرقوق لو دخلتي فيها بندق مطحون الطعم كله هيتغير ومهما باظت منك هيبقى طعمها تحفة، لإن نكهة البرقوق مع البندق والزبدة هتقضي على أعصاب أي حد.
من هنا حبيت أعمل وصفات أينا ووصفات تانية دقتها في مطاعم ودفعت فيها ١٠٠ و ٢٠٠ جنيه مع إنها متكلفش بأكتر من ٥٠ جنيه بالكتير كمان.
مش هوعدك إنك تلاقي هنا وصفات مش موجودة في حتة تانية، بس هي وصفات الشيف أينا جارتن -Ina Garten- بالتريكات والحيل بتاعتها ووصفات تانية اكتشفتها أنا كمان.

Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

الكب كيك الهش بالفانيليا وقطع الشوكولاته