فراخ بالكاري وحليب جوز الهند



أول مرة أعمل أكلة بحليب جوز الهند، بس فعلا طلعت جامدة جدا
الوصفة من جيمي أوليفر بطل الوصفات السريعة اللي مش بتزيد عن ٣٠ دقيقة، والنكهات اللي في الطبق ده مشكلة فعلا!
مبدئياً الريحة هتقلب البيت وهتجوع اللي مش عايز ياكل.


دجاج - فراخ- بالكاري وحليب جوز الهند


أحلى ما في الوصفة دي إن مفيهاش كركبة كتير، يعني بعد ما خلصتها مكانش فيه حاجات كتير تتغسل ولا تتنضف، كله اتحط على بعضه بسرعة وخلاص.
الأكل كله مخدش أكتر من نص ساعة تحضير وطبخ

المقادير:
  • شرائح صدور فراخ على قد اللي هياكلو (لشخصين ٤ شرائح صدور وبالتالي لو عدد الأشخاص أكثر يبقى نكتر عدد الشرائح على قد الأشخاص) ونقطعها مربعات كبيرة شوية يعني ممكن كل شريحة تعمل ٥ أو ٦ قطع
  • ١ بصلة صغيرة (حمرا أو صفرا حسب الرغبة)
  • ٢ جزرة مقشرة ومقطعة نصف حلقات
  • خضار مشكل ني (فاصوليا، كوسة، بسلة) متقطعة وممكن تزود أي نوع خضار تحبه
  • فلفل ألوان
  • ٢ بصل أخضر
  • ربع كوب زيت (نباتي، زيتون أو أي نوع زيت تفضلونه)
  • معلقتين كاري
  • معلقة تشيلي صوص (لو مش موجود ممكن نستبدله برشة شطة)
  • معلقتين كبار صويا صوص خفيف
  • معلقتين كبار زبدة فول سوداني (بترفع النكهة والطعم لأبعاد تانية خالص مختلفة عن لو محطيناهاش)
  • علبة لبن جوز هند (ده هتلاقوه في قسم القشطة ولبن الصويا في سوبرماركت سعودي، وموجود في مترو وخير زمان ومعظم الهايبر ماركت)
  • معلقتين كبار لبن عادي بقري
  • نص لمونة
  • رشة ملح (إذا استلزم الأمر وممكن منستعملهاش خالص)

دجاج بالكاري وحليب جوز الهند

الطريقة:

أولاً على نار عالية (مش هنوطي النار خالص غير في مرحلة متأخرة)

  1. أول حاجة هنبدأ بالووك أو الطاسة الكبيرة ويستحسن تكون غويطة عشان نعرف نقلب الصوص والمكونات فيها، نسخن الووك وفيها ربع كوب زيت.
  2. بعدين نحط البصلة المتقطعة شرايح (جوليان) ومعاها قطع الفراخ ياخدوا تشويحه دقيقة ونحط معلقتين الكاري ونقلب
  3. أول ما تبدأ ريحة الكاري والفراخ تطلع نحط الجزر المتقطع يستوي
  4. بعدين نحط الفلفل الألوان، الخضار، البصل الأخضر وعليهم الصويا صوص والتشيلي صوص أو الشطة ونقلب بحيث كله يبقى لون واحد
  5. نضيف معلقتين زبدة الفول السوداني ونقلب الخليط وهنلاحظ إنه تقل أوي 
  6. نضيف لبن جوز الهند ومعلقتين اللبن البقري ونص لمونة ونقلب
دلوقتي هنوطي النار ع الآخر ونسيب كل حاجة تستوي بشويش، هنا ممكن ندوق الصوص لو محتاج رشة الملح أو لأ، ولما نلاقي الخضار استوى والفراخ نشيله من على النار، ممكن يتزين بعد كدة بالبقدونس أو كزبرة (الكزبرة بتمشي في طعمها جدا مع لبن جوز الهند).


دجاج بالكاري وحليب جوز الهند

أنا عملت جمبه رز بسمتي بالكاري والكمون وشوية زبيب عليه.
 

Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

الكب كيك الهش بالفانيليا وقطع الشوكولاته