بطاطس جاكيت Jacket Potato


كنت بدور على مكان نقعد فيه وقابلني بالصدفة مطعم اسمه Jacket Potato في المعادي، بصيت في المينيو بتاعه لقيت حاجات كتير شكلها حلو بس الخلاصة بطاطسايه مشقوقة من النص وفيها اللي إنت تحبه، لحمه، فراخ، أو خضار
الصدمة كانت في سعر هذه البطاطسايه من ٣٥ وانت طالع، والسؤال اللي جه على بالي وقتها واستحضرني: 
ادفع في بطاطسايه ٤٠ جنيه ليه؟ حتى لو هيحشوها كافيار يعني!!!
دورت ودعبست إزاي بتتعمل ولقيت وصفتها، ولقيت إن كتير بيحطوها في الفرن ساعتين وبعدين يحشوها زي ما يحبو، ولإن الحياة قصيرة واليوم فيه كام ساعتين أصلا؟ فدعبست تاني ودورت تاني لحد ما لقيت وصفة تخليك تعمل أحلى جاكيت بوتاتو في ١٥ دقيقة متزيدش ثانية واحدة، والسر في الميكروويف.


المقادير:
  • ثمرتين بطاطس حجم متوسط
  • ملح
  • فلفل
  • زيت زيتون
  • والحشو اللي تحبه، أنا اخترت جبنة رومي وبصل أخضر، ممكن لحمة مفرومة وSour Cream أو أي حشو تحبه

طريقة العمل:
  1. هنغسل البطاطس تحت المية وبفرشة بفركها عشان أنضف الطينة من عليها وأغسلها كويس وأسيبها بقشرها واخرمها بالشوكة كام خرم كدة عشان تدخل فيها التتبيلة وتستوي كويس من جوا
  2. بجيب كيس الفرن وبحط فيه البطاطس اللي هعملها سواء ٢ أو أي عدد واتبلها جوا الكيس بالملح والفلفل وزيت الزيتون (ده بيخلي القشرة متبلة ومقرمشة)  وبعمل خرم واحد في الكيس عشان مينفجرش جوا الميكروويف
  3. ادخل الكيس بالبطاطس جواه في الميكروويف لمدة ٦ دقايق
  4. أخرجها وأشيلها من الكيس وبالشوكة أعمل اختبار أشوف قد إيه استوت من جوا ولا محتاجة تكمل سوا جوا الميكروويف لو تمام بطلعها من الكيس
  5. اشقها بالسكينة من النص واحط الجبنة الرومي وأدخلها الميكروويف ٣٠ ثانية تسيح جوا وأخرجها أحط أي حشوة إضافية بصل أخضر أو كزبرة خضرا وبالهنا والشفا

Comments

Popular posts from this blog

تيراميسو كلارا - التيراميسو الإيطالي الأصلي

البراوني الأفضل على الإطلاق

دجاج بالترياكي من واجاماما