مكرونة بالجبنة Mac and Cheese



من الوصفات السهلة جداً واللي كنت فاكراها صعبة الصراحة، بس طلعت سهلة جدا وممكن بعد إتقانها نزود عليها حاجات مختلفة.
أحلى حاجة في الوصفة دي إنها كلها ممكن تتعمل بالليل (للسيدات العاملات) وندخلها التلاجة وتاني يوم قبل الأكل بنص ساعة تدخل الفرن.
الوصفة لأينا جارتن Ina Garten صاحبة برنامج Barefoot Contessa

المقادير:
  • كيس مكرونة (٤٠٠ جرام) ممكن نستعمل أي نوع مكرونة بس أغلب المكرونة المستعملة في الأكلة دي النوع الملفوف ده
  • تمن كيلو جبنة شيدر
  • تمن كيلو جبنة بارميزان ولو مفيش استعملوا مكانها الجبنة الرومي بس تكون جديدة مش حادقة
  • معلقتين دقيق كبار
  • معلقتين زبدة كبار
  • كوب ونص لبن
  • جوزة الطيب
  • ملح وفلفل
  • ٤ شرايح توست مضروبين (ممكن يزيد التوست حسب حجم الصينية)


الطريقة:
  1. هنسلق المكرونة عادي خالص (أسخن مية في حلة وفيها رشة ملح ولما تغلي أسقط المكرونة، وبلاش حركة نقطة الزيت علشان المكرونة متلزقش دي، لإن المكرونة اللي نوعها كويس غالبا مش بتلزق وبمجرد ما تتسلق لو حطينا عليها مية ساقعة مش هتلزق ومش هتكمل سوى فمش هتتهري)
  2. نعمل صوص الجبنة بقى واللي هو معلقتين زبدة كبار سايحين على نار هادية خالص، اضيف عليهم معلقتين الدقيق واقلب لحد ما يختفي الدقيق خالص
  3. احط كوباية اللبن ونص على الخليط وملح وفلفل ورشة جوزة الطيب وأقلب
  4. أحط عليهم الجبنة الشيدر والرومي أو البارميزان وأقلب عشان تسيح جواها
  5. لما يتقل الخليط شوية ويبقى شبه الكريمة يبقى خلصنا الصوص
  6. نضيف المكرونة على الصوص في حلته ونقلبها الأول بعدين ننقل كل مكونات الحلة في صينية هتدخل الفرن أو بايركس (بعد ما نحط فيها نقطتين زيت عشان المكرونة متلزقش)
  7. بعد مساواة المكرونة في الصينية ننثر على الوش فتات التوست المضروب لتغطية الوجه بالكامل
  8. تدخل الصينية الفرن على حرارة ١٨٠ لمدة ٣٠ - ٣٥ دقيقة، لحد ما وشها يحمر
الإضافة اللي زودتها أينا جارتن إنها زودت عليها لحم كابوريا قطع، وبالتالي ممكن نستبدله بحاجات كتير بس شرط إن اللي هنزوده ميتهريش بسهولة ويستحمل فرن، يعني مينفعش سمك فيليه لإنه هيتهري بسهولة، بس ممكن كالاماري للي يحبه مثلا وممكن تونة أو عيش الغراب وممكن جدا نضيف بروكلي لمحبي الخضار :) بالذات إنه هياخد نكهة الجبنة وهيضفي طعم مختلف.


Comments

Popular posts from this blog

تيراميسو كلارا - التيراميسو الإيطالي الأصلي

البراوني الأفضل على الإطلاق

دجاج بالترياكي من واجاماما