دجاج بالترياكي من واجاماما



تجربة أكل جديد أو نوع مختلف حاجة بتكسر الملل، وصحية جدا من وقت لآخر، عشان كدة كانت فرصة نجرب فيها أكل مطعم آسيوي كان فاتح في مصر قبل ٢٠١١ اسمه واجاماما Wagamama
المطعم ده بيعمل أكل تحفة بمعنى الكلمة، تحس إنك خرجت بره مصر ونسيتها ومش فيها أصلا.

أكلنا فيه كذا مرة أنا وزوجي ويوم ما عرفنا إنه قفل حسينا إننا فقدنا حاجة عزيزة لدرجة إن زوجي راسلهم وسألهم عن سبب القفل وعرف منهم إن بعد الثورة وعدم استتباب الأمن والظروف الاقتصادية في مصر خلت من الطبيعي إنهم يقفلوا كـ Business Wise وشكروه ووعدوه إنهم لو رجعوا مصر تاني هيقولولنا

المطعم الرائع ده عامل حاجة اسمها Wagamama CookBook وفيه بيقدم وصفات المطبخ بتاعه،
فكرت أعمل أكله من المطبخ بتاعهم بس زودت حته من عندي هقولكوا عليها في وسط الأكل، الوصفة لفراخ بصوص الترياكي.




المقادير:
  • نص كيلو صدور دجاج مقطعة شرايح أو الحجم اللي تحبوه
  • ٦ فصوص توم مهروسين بما يعادل معلقتين توم
  • ٥ معالق كبار صوص الترياكي (ليه وصفة إزاي يتعمل في البيت بس لو كدة كدة عشان تعمليه هتشتري صويا صوص فيبقى هاتي الترياكي صوص معاكي بالمرة ووفري جهدك)
  • معلقة كبيرة بودرة فلفل حار
  • ملح وفلفل
  • جنزبيل فريش أو بودرة (دي الحتة الزيادة اللي من عندي لإن طعم الجنزبيل فرق جامد جدا)
  • جزر مقطع شرايح أو بالشكل اللي شبه الفراخ
  • بصل مقطع شرايح أو بالشكل اللي شبه الفراخ
  • فاصوليا (أنا أخدت شوية من كيس فاصوليا مجمدة)
  • فلفل ألوان مقطع شرايح أو بالشكل اللي شبه الفراخ
  • معلقتين زيت زيتون

دجاج بصوص الترياكي من واجاماما

طريقة العمل:

  • هنغسل صدور الفراخ بالدقيق والملح والخل ونشطفهم والأفضل إننا ننشفهم قدر الإمكان عشان ياخدوا من التتبيلة كويس
  • هننقع الفراخ في التتبيلة (٥ معالق ترياكي صوص + نص معلقة بشر جنزبيل أو بودرة جنزبيل + ٦ فصوص توم مهروسين + رشة ملح وفلفل + معلقة كبيرة بودرة فلفل حار) 
  • نقلب الفراخ مع كل التتبيلة ونسيبها في التلاجة ما لا يقل عن ٣ ساعات
  • في الووك أو الطاسة نحط معلقتين زيت زيتون أو زيت ذرة ونشوح الفراخ بالتتبيلة اللي عليه كله لحد ما تاخد لون
  • بعدين نحط عليهم البصل والفلفل والجزر والفاصوليا أو أي نوع خضار نحبه ونقلب على نار عالية
  • بعدين نوطي النار شوية (تبقى متوسطة)  نسيبها تستوي ربع ساعة
  • بعدين ندوق ونظبط الملح والفلفل وممكن من الفلفل الحار تبقي محتاجة نص معلقة عسل عشان تبقى حلوة وممكن معلقة صوص ترياكي كمان لما تشرب ميتها ونطفي عليها لما كله يستوي
أنا عملت جمبها رز أبيض بالكاري بس ممكن تعملوا جمبها نودلز أو أي نوع نشويات تحبوه

Comments

Popular posts from this blog

تيراميسو كلارا - التيراميسو الإيطالي الأصلي

البراوني الأفضل على الإطلاق