تيراميسو كلارا - التيراميسو الإيطالي الأصلي

كل ما كنت اسمع كلمة تيراميسو كنت أفتكر إنها كيكة بالقهوة، وفعلا فيه كيكة تيراميسو بس التيراميسو الأصلي عبارة عن بسكوت بالقهوة مفيش كيك ولا دقيق خالص

وصفة التيراميسو دي مستوردة من زوجة خالي الإيطالية وعشان كدة سميتها تيراميسو كلارا.
مبدئيا كدة تيراميسو هي كلمة إيطالي معناها "إرفعني" والقلشة الإيطالي عليها لما حد بيسأل التاني تاخد تيراميسو فيقلش ويقوله لا تيراميچو ومعناها "نزلني"
الفكرة ببساطة إن التيراميسو قهوة وشيكولاتة وكلها منبهات فبتعمل على رفع طاقة الجسم لمستوى عالي ومن هنا جت كلمة تيراميسو.. ده على حد ما الإيطاليين شرحهولي :)

نيجي للوصفة بقى.. مبدئيا فيه ناس بتعملها حجم كبير في بايركس وفيه بيعملوها في كاسات زي الصور دي


وفي مصر نادر ما هتلاقي حد بيعمل التيراميسو بوصفتها الصحيحة يا دوبك محلين تلاتة منهم Paul ومحل تاني اسمه Buffalo في كايرو فيستيفال سيتي، غير كدة في ستاربكس هتلاقيها حاجة معكعكة بالقهوة أعوذ بالله يعني
المشكلة إنك هتدفع في القطعة الواحدة ٣٦ أو ٤٠ جنيه مع إنك لو عملتها بجبنة ممتازة مش هتزيد أصلا عن المبلغ ده وتعمل ٨ قطع مش واحدة.

الوصفة والمقادير دي لصينية بايركس كبيرة مش كوبايات

ملحوظة بس للي ميعرفش، البيض الني لما بيدخل عليه سكر بيتغير تماما مكوناته ومبيبقاش بيض ني خالص، البيض من المكونات اللي بيتغير بتغير الحرارة والمكونات اللي داخله معاه مش بيحتفظ بكينونته لوحده كدة، وبالتالي أنا واحدة أصلا مبتاكلش بيض خالص لوحده لا مسلوق ولا مقلي ولا أي شكل باكل التيراميسو ومفيش أدنى إحساس بوجود بيض أصلا.



المقادير:
  • ٣ بيضات كبار
  • علبة جبنة فيلادلفيا ٣٥٠ جرام (المفروض بتتعمل بجبنة ماسكروبني بس العلبة دي للي يحب يجيبها متوسط سعرها في السوبرماركت ب٥٠ جنيه)
  • كوبايتين قهوة سخنين (نسكافية أو نسكافيه جولد بدون سكر)
  • معلقة كاكاو بودرة غير محلى
  • ربع كوب سكر
  • بسكوت صوابع Ladyfingers وده رخيص وبيتجاب من سعودي أو كارفور هتلاقوه  ب ٢٠ جنيه وفيه أقل كمان

الطريقة:
  • أول حاجة هنفصل صفار البيض عن البياض ونضرب صفار البيض مع نص كمية السكر بالمضرب الكهربي كتير لحد ما يبقى كريمة
  • نزود عليه معلقتين قهوة ونضرب علطول عشان البيض ميستويش
  • وننزل عليهم علبة فيلادلفيا أو الماسكربوني ونكمل ضرب لحد ما كله يبقى كريمي الشكل
  • البياض بقى نحط عليه نص كمية السكر الباقيه ونضرب البياض بالمضرب الكهربي مدة من ٥ لحد ٦ دقايق لحد ما يعمل رغوة ويمسك نفسه شوية
  • بعدين نشيل المضرب الكهربي خالص ونتعامل بالسباتولا، ونضيف بياض البيض على الخليط الكريمي اللي عندنا ونقلب بشويش ناخد من تحت لفوق عشان الهوا اللي في الكريمة ميروحش
  • بعد ما كله يدوب في بعض هنبدأ الرص في البايركس
  • نجيب طبق غويط ونحط فيه كوبايتين النسكافيه السخنين ونمسك صباع بسكوت نسقسقه في القهوة ونرص في البايركس، خلي بالك ان البسكوت هش جدا ولو فضل وقت في القهوة هيبوش خالص
  • نرص طبقة بسكوت عليه نص كمية الكريمة وبعدين طبقة بسكوت تانية وطبقة كريمة ونغطي البايركس ويدخل التلاجة لمدة ١٢ ساعة على الأقل
  • قبل التقديم بنرشرش عليه شوية كاكاو بودرة غير محلى ويتقدم ساقع
بعد ما تقدمه شوف بس رد فعل اللي هياكل قدامك وياريت لو تصوره وهو بيعيط من فرط اللذة بالذات لو كان مدمن كافيين

* فيه وصفات للتيراميسو فيها بدل ٣ بيضات بيستعملوا ٦ بيضات ويرموا البياض ويستعملوا الصفار بس، ده طبعا عشان تكون الكريمة دسمة وماسكة نفسها أوي،، أنا محبتهاش كدة ومحبتش ارمي البياض الصراحة بس للي يحب الوصفة كدة يعملها، أينا جارتن بتعملها كدة مثلا.

Comments

Popular posts from this blog

البراوني الأفضل على الإطلاق

دجاج بالترياكي من واجاماما