ملوخية بالجمبري

تقدر تقول إن الوصفة دي خلاصة البحث في وصفات شيفات معروفين زي الشربيني على علاء الشربيني على يسري، والصراحة أنا جمعت الأفضل من وصفاتهم التلاتة، يعني م الآخر كدة وصفة خلاصة الخلاصة.




المقادير:
  • نص كيلو ملوخية مجمدة أو مخروطة 
  • شوربة سمك (الشيف عملها بإنه حط العمود الفقري بتاع سمك وقشر جمبري وغلاهم بالبهارات والتتبيل اللي تحبوه واستعمل الميه دي للشوربة) بس أنا مكنش عندي الحاجات دي الصراحة وكنت عايزة أنجز فاستعملت شوربة لحمة كانت عندي، ورأيي المتواضع أن أي نوع شوربة يمشي، بس لو على الأحلى أكيد شوربة سمك.
  • ٥ فصوص توم مهروسين 
  • نص كيلو جمبري مغسول ومقشر (ممكن يكون المجمد وبغسله بلمون وملح وخل)
  • معلقة صغيرة ونص كزبرة ناشفة
  • زيت ذرة
  • معلقة كزبرة خضرا
  • ملح وفلفل



الطريقة:
  1. نحط الشوربة على النار تغلي ونحط فيها فصين توم فقط من المهروسين، ونظبط الملح والفلفل بتاعها ونضيف نص معلقة صغيرة كزبرة ناشفة
  2. أول ما تغلي الشوربة اضيف عليها الملوخية علطول (لو كانت مجمدة احطها مجمدة مستناهاش تفك) وأقلب علطول لتفادي تكتل الملوخية
  3. في طاسة منفصلة نحط معلقتين زيت أي نوع زيت أنا استخدمت زيت ذرة، وفي الزيت حطيت معلقة بهارات وفص واحد توم ورشة ملح وفلفل ونشوح الجمبري
  4. بعد ما يستوي بسيط مش جامد عشان لسه هيتسوي شوية داخل الملوخية ارفع الطاسة واضيف الجمبري والزيت اللي فيه بكل نكهاته على الملوخية وأقلب واستناها تغلي غلوة واحدة
  5. في الوقت ده أعمل الطشة، شوية زيت وأضيف ليه فصين توم مهروسين وبعدهم علطول أضيف الكزبرة الناشفة وكزبرة خضرا كمان وبالضبط دقيقة واحدة على النار ثم ارفعهم وانزل بيهم على الملوخية، المفروض مستناش لما التوم يتحمر أو يتحرق وده السر اللي قاله الشيف يسري إنه مش بيستنى خالص لما التوم يستوي أو ياخد لون بينزل بيه شبه ني والزيت يكون تشبع بالنكهة بس
  6. بعد الطشة بنسيب الملوخية تغلي غلوة واحدة وبس
أنا أول مرة أجرب الملوخية بالجمبري بالطريقة دي والصراحة لقيتها أظرف بكتير من طريقة إننا نشوح الجمبري في بصل بيبقى تقيل جدا بصراحة
بالهنا والشفا :)

Comments

Popular posts from this blog

تيراميسو كلارا - التيراميسو الإيطالي الأصلي

البراوني الأفضل على الإطلاق

دجاج بالترياكي من واجاماما