الكشك


إنه الكشك يا سادة...
الحل المثالي لما تزهق من المكرونة والرز كل يوم

فيه ناس بتحب تعمله بقطع الفراخ المسلوقة وناس بتحبه سادة، عشان كدة لطيف إنه يكون عندك شوربة فراخ متجمدة في الفريزر بدل استخدام شوربة ماجي والحاجات الصناعي دي.
عموما أنا لما بسلق فراخ أو لحمة بشيل جزء من الشوربة في أكياس وأجمدها واستعملها وقت الحاجة.



المقادير (تكفي لشخصين):
  • ٣ معالق كبيرة دقيق
  • كوبايتين شوربة
  • ٢ كوب زبادي
  • بصل شرائح
  • ملح وفلفل
  • زيت تحمير



الطريقة:
  1. هنشوح البصل في الزيت لحد ما يطرى وياخد لون بسيط ونرفع نصه نشيله على جمب للتزيين على الوجه في النهاية
  2. على باقي البصل الموجود هضيف الدقيق والزبادي ونقلبهم مع بعض ثم اضيف الشوربة
  3. نقلب الخليط كله لمدة ١٨ - ٢٠ دقيقة لحد ما نحصل على قوام الكشك التقيل
  4. نرفع الخليط من على النار ونصبه في أطباق التقديم ونحط على الوش البصل المتحمر



ملحوظتين:
  • لو عايزين نحط فيه فراخ ممكن نضيفها بعد إضافة الشوربة وتقليب الخليط لتجنب أي كلكعة من الدقيق.
  • الطريقة دي الكشك بيكون فيه جزء من البصل وعلى الوش جزء تاني.. للي مش بيحب البصل جوا يرفع كل البصل من الزيت ويضيفه على الوش بس


Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

الكب كيك الهش بالفانيليا وقطع الشوكولاته