دجاج بالخرشوف بصوص مميز

كنا في مطعم Crave وطلبت الطبق ده قلت أجربه ولقيتني بدفع ٨٠ جنيه تمن الطبق.. لما حسبتها لقيته ميكملش ٤٠ جنيه الصراحة وقررت أعمله في البيت بالتذوق كده 
الوصفة طلعت تحفة لدرجة إني بقيت بعمله في العزومات والناس بتفتكره أكل من بره :)



المقادير:
  • نصف كيلو صدور دجاج مغسولة ومقطعه شرائح 
  • كيس خرشوف مجمد
  • ملح وفلفل
  • نص معلقة صغيرة جوزة الطيب
  • نص معلقة صغيرة بودرة توم
  • نص معلقة صغيرة بودرة بصل
  • رشة روزماري
  • رشة زعتر
  • نصف مكعب ماجي بنكهة الدجاج
  • معلقة صغيرة خل
  • كريمة طبخ لباني
  • نصف لمونة


الطريقة:
  1. بجيب شرايح صدور الفراخ وبتبلها بالملح والفلفل وأشوحها في معلقة زيت (أي نوع أنا استعملت زيت ذرة)
  2. أقلب الفراخ جوا الطاسة (Stir Fry) لحد ما تاخد لون دهبي بسيط وأبدأ أحط التوابل عليها (جوزة الطيب، رشة ملح، فلفل، بودرة توم، بودرة بصل) وأقلب
  3. بعد كدة احط نقطتين خل جوا الطاسة عشان أطلع نكهة الفراخ اللي موجودة وأول ما الخل يتبخر اضيف قطع الخرشوف تاخد لون مع الفراخ (الطبيعي إن الفراخ هتستوي في وقت أطول من الخرشوف عشان كدة ببدأ بيها بس مسيبهاش على النار لحد ما تاخد لون جامد وإلا هتبوظ لما أضيف ليها الخرشوف)
  4. أقلب كل المكونات سوا وأضيف علطول الكريمة اللباني أول ما الخرشوف يبدأ ياخد لون وأوطي النار ع الأخر
  5. وأضيف نص مكعب ماجي لتعزيز النكهة ورشة روزماري ورشة زعتر وأقلب
  6. أغطي الطاسة لمدة ٢٠ دقيقة تقريبا بيبقى كله استوى على نار هادية 
  7. قبل ما أطفي عليها خالص الصوص لازم ندوقه لو ناقص ملح أو فلفل أو توم نزود حسب الرغبة
  8. بعد ما بطفي عليها بعصر نصف لمونه لإضافة نكهة مميزة على الصوص

أنا عملت جمب الطبق بطاطس بيوريه وفلفل زينة، زي ماكان متقدم في المطعم مع بطاطس بيوريه وخضار سوتيه.

ملحوظة:
ممكن استعيض عن بودرة البصل بإني أشوح بصل مقطع صغير مع الفراخ في الأول، بس ده لو اللي هياكل معندوش مانع ياكل قطع البصل دي.

Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

الكب كيك الهش بالفانيليا وقطع الشوكولاته