بف باستري بالفاكهة

البف باستري هي العجينة اللي بحرص إني اجيبها واسيبها في الفريزر دايما عشان يوم ما أحب أعمل حاجة حلوة ومعنديش وقت بطلعها وبعمل بيها أي حاجة ودايما بتسد معايا :)

المرة دي أنا كان عندي كومبوت خوخ متقشر ومتقطع نصين فكان فرصه إني استخدمه مع البف باستري، أي نوع فاكهة عندكو تقدروا تستخدموه وتبدعوا في المكونات، كريز، أنانس، تين، كمثرى... أي نوع أهم حاجة لو الفاكهة ناشفة أو تستحمل الحرارة زي الخوخ والتفاح والكمثرى والأنانس يبقي ممكن تتحشي بيها البف باستري وتدخل الفرن، لو الفاكهة طرية يبقي استخدمها فوق البف باستري لما تخرج من الفرن بلاش تتهري.


دي مش وصفة قد ما تقدر تقول فكرة يعني بس طعمها أكثر من رائع بالذات إنها بتتعمل في تلت ساعة بس :)

المقادير:
  • قشطة (بلدي أو بوك أو نستله)
  • سكر بودرة
  • فاكهة أنا استخدمت الخوخ المتقشر والمتقطع نصين
  • عجينة البف باستري اللي هي كتلة على بعض مش رقائق منفصلة لتسهيل التوزيع والحشو
  • ١ بيضة
  • دقيق للعجين
الطريقة:
  • بعد ما بتكون عجينة البف باستري فكت بره الفريزر وتخلصنا من التجميد، هنفرد العجين بالنشابه على قليل من الدقيق عشان متلزقش
  • نفرد العجينة داخل قالب التارت أو نوزعها على قالبين مربعين أو أي شكل احنا نحبه حسب أعداد الناس اللي هتاكل ونفرد العجين بزيادة عن قالب التقديم عشان العجين الزائد هيبقي الغطا بتاع التارت ده
  • هنعمل الحشو وهو عبارة عن  قطع من القشطة ومعاها قطع من الخوخ ونرشرش سكر البودرة ونضيف الحشو جوا العجين
  • نغطي الحشو بالعجين الزائد ونحكم الغلق ونعمل شوية خروم بالشوكة عشان تطلع مقرمشة
  • نكسر البيضه ونضيف عليها رشة سكر بودرة ومعلقة مياة وده اسمه Egg wash وندهن السطح العلوي للعجين بالEgg wash ده
  • ونكون مسخنين الفرن على ٢٠٠ وندخل العجين في الفرن لحد ما يحمر الوش وينفش
  • بعد كدة نزينه باللي احنا عايزينه ممكن قطع من الفاكهة اللي استخدمناها في الحشو ونرشرش شوية سكر بودرة حسب الرغبة

Comments

Popular posts from this blog

تيراميسو كلارا - التيراميسو الإيطالي الأصلي

البراوني الأفضل على الإطلاق

دجاج بالترياكي من واجاماما