صوص البيستو، الريحان Pesto Sauce


عمرك شفت مكرونة بصوص أخضر؟!
هو ده الصوص الأخضر، صحيح احنا لازقين في المكرونة بالصلصة الحمرا بس لما تجرب صوص البيستو أو صوص الريحان ده هتغير فكرتك عن اللون الأخضر وجماله وريحته اللي بتجوع.

صوص البيستو بيستعمل في أكلات كتير أشهرها المكرونة بس ممكن يتعمل بيه حاجات كتير جدا، مثلا:
  • صدور مشوية
  • صوص للبيتزا بدل الصلصة الحمرا ومعاه مشروم بيبقى تحفة
  • ممكن سلمون
  • دريسنج لسلطة
  • جربه مع بطاطس بيوريه بيدي نكهة تحفة
  • ممكن مع أومليت 
  • استعمله صوص على الجبنة في سندوتش 
لما تدوقوا الصوص هتعرفوا ممكن يمشي على إيه، وطبعا الوصفة للكونتيسة أينا جارتن
أنا بحفظه في برطمان وبحط على وشه زيت زيتون يمنع وصول الهوا ليه زي ما بنعمل في برطمان الصلصة المفتوح وبحط سوليفان على الوش وبقفل البرطمان واحفظه في التلاجة ممكن يقعد لحد سنة ميتغيرش حتى لونه والنكهة بتقوى مع الوقت، لو نسيت تحط على الوش زيت، يبقى الموضوع كله باظ وانسى إنك تعرف تستعمل الصوص ده تاني يوم.



المقادير:
  • ربع كوب صنوبر
  • ربع كوب عين جمل
  • كوب ونص زيت زيتون
  • كوب بارميزان مبشور ولو مفيش جبنة رومي مبشور بس تكون جديدة أو اختاروا الأقل ملوحة
  • حزمتين ريحان أو ممكن تخلطوا بين حزمة ريحان وحزمة بقدونس بتدي نكهة تحفة
  • معلقة صغيرة فلفل
  • معلقة صغيرة ملح
  • ٩ فصوص توم مهروسين


الطريقة:
  1. أول حاجة بجيب طاسة تيفال وبحمص فيها عين الجمل الأول بعدين الصنوبر لإن الصنوبر بيتحمص أسرع من عين الجمل
  2. بضيف المكسرات في الكبة وبضربها مع ٩ فصوص الثوم المهروسين
  3. بضيف عليهم الخضرة (الريحان والبقدونس) بس يكون الريحان والبقدونس مغسولين ومتنشفين كويس عشان يفضل لونهم أخضر فترة طويلة
  4. واضرب الخليط كله في الكبة ثم أضيف الملح والفلفل والمفروض وأنا بضرب اصب الكوب ونصف زيت زيتون لو فيه فتحة في الكبة عندك لو مفيش يبقى وانتي بتضيفي الخضرة نضيف شوية زيت ولما نضيف الفلفل والملح شوية تانيين وهكذا
  5. بعد كدة في الآخر خالص بعد ما كنت ضفت كل الزيت اضيف الجبنة المبشورة واضرب تاني لمدة ٣٠ ثانية لحد ما يبقى القوام بالظبط شبه الملوخية، قوام الملوخية التقيلة، وهيبقى عندك أقوى صوص بيستو ريحته تحفة

Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

الكب كيك الهش بالفانيليا وقطع الشوكولاته