فتة شاورمة اللحم


بعد اللف والتفحيص والتمحيص بين وصفات كتير بالعربي والإنجليزي أخيرا وصلت للوصفة دي وبعد التجربة هي فعلا أفضل وصفة أشبه حاجة بالشاورمة اللي بناكلها بالظبط من الشارع وبدون استخدام دهن ولا ليه ولا الحاجات اللي تتخن قوي دي.. وطبعا ليك مطلق الحرية في استخدام الليه والدهون اللي أكيد هتخلي طعمها أجمل وأحلى، بس تأكد إن ريحة الفرن والبيت هتبقي بالظبط شبه محلات الشاورمة اللي بتجرّي ريقنا في الشارع.

الطبق ده بلا فخر بيتباع ب ٦٠ جنيه في المطاعم اللبناني وبعد عمايله لو حسبتها هتلاقي الطبق فعليا متكلفش نص تمنه علما بإن كل المقادير بيتي ومتأكد من جودتها.


المقادير:
  • نص كيلو لحم متقطع شاورمة صغير
  • خبز لبناني
  • زيت زيتون
  • بهارات شاورمة من العطار أو من البهارات الجاهزة (سبايسي، أبوعلي والماركات الشبيهه)
  • ٢ لمون
  • ٤ معالق كبار خل
  • معلقة كبيرة وورشستر صوص 
  • ملح وفلفل
  • كوب حمص مسلوق 
  • طماطم مقطعة صغير
  • بقدونس مقطع صغير
  • سلطة طحينة معمولة بس ياريت نخففها شوية تبقى صوص طحينة مش تقيلة



الطريقة:
  1. أول حاجة هنتبل الشاورمة ببهارات الشاورمة وعصير لمونتين و٤ معالق خل وملح وفلفل ومعلقة وورشستر صوص وأشيلها في التلاجة لفترة ٤ - ٥ ساعات (للي بيحب الشاورمة حراقة شوية ممكن يضيف شطة أو فلفل حامي)
  2. اضيف معلقتين زيت زيتون على خليط اللحم بتتبيلته وفي بايركس وأغطيه بورق الفويل وادخله الفرن على حرارة ١٦٠ لمدة ساعة ونص 
  3. في نفس الوقت اللي الفرن شغال فيه، اقطع الخبز اللبناني قطع صغيرة وأقلبه في قليل من زيت الزيتون وأرصه على صينيه وأحمصه في الفرن
  4. بعد ساعة ونصف يكون اللحم استوى، أخرجه من الفرن واشيل الفويل عشان اللحمة تنشف السوائل اللي فيها شوية وأضيف عليها الطماطم المقطعة صغير والبقدونس وأقلب
  5. أبدأ أرص الفتة في الطبق هبدأ بالعيش اللبناني المحمص، وأضيف عليه الشاورمة بالطماطم والبقدونس (طبعا ممكن نضيف بصل للي حابب) وعلى الشاورمة أضيف الحمص ثم صوص الطحينة.

Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

الكب كيك الهش بالفانيليا وقطع الشوكولاته