ورقة لحمة بالخضار


أكلة سريعة جدا مفيهاش تحضير كتير وبتدخل الفرن ونتيجتها مضمونة، أما الطعم ففوق الممتاز وده يخليها أكلة مثالية لعزومات وأيام الملل من كل الأكل
وممكن تعتبرها طريقة مختلفة لاستخدام شرايح لحم البوفتيك بدون قلي


المقادير:
  • نصف كيلو لحم شرايح بوفتيك
  • بطاطس، خضار مشكل حسب الرغبة
  • ثمرة فلفل أحمر
  • 2 طماطم مقطعة شرائح
  • 2 بصل شرائح
  • 3 فصوص توم
  • ملح وفلفل
  • معلقة صغيرة عسل
  • معلقة صغيرة خل
  • روزماري
  • زعتر
  • وورشستر صوص
  • جوزة الطيب
  • بهارات لحم
  • كاري


الطريقة:
  1. نتبل اللحم بملح وفلفل ومعلقة كبيرة وورشستر صوص وبهارات لحم وروزماري وزعتر و3 فصوص توم مهروسين ورشة جوزة الطيب ومعلقة صغيرة خل ومعلقة صغيرة عسل نوزعها على اللحم ونقلب كل ده عشان كل شرايح اللحم تاخد من التتبيلة
  2. في صينية بايركس نفرش ورق زبدة ونحط عليه كل المقادير ني في ني نبدأ نرص اللحم الأول بعدين شرايح البصل ونوزع معلقة سمنة أو زيت على الخليط (غالبا السمنة بتكون أحلى في الصنف ده لان شرايح البوفتيك خاليه من الدهون تماما)ز
  3. نرص الخضار اللي نحبه ممكن خضار مشكل أو بطاطس أو كله مع بعض، أنا جربت البطاطس بس وعليها رشة كاري وملح وفلفل 
  4. فوق البطاطس نرص شرايح الطماطم وشرايح فلفل أحمر (شرايح الفلفل الأحمر بتعمل طعم مختلف خالص كأنك شويت الفلفل مستوى أخر من الطعم)
  5. بعد كدة نقفل ورق الزبدة ونحكم غلق البايركس بورق ألومنيوم (فويل) ونعمل كام ثقب في الفويل
  6. ندخل الصينية الفرن على 180 لمدة ساعة وبألف هنا ممكن جمبه نعمل أرز أبيض أو بسمتي بالكاري هيبقى لايق جدا على الصينية


Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

الكب كيك الهش بالفانيليا وقطع الشوكولاته