دجاج تندوري

اللي احنا نعرفه ان الفراخ التندوري اللي هي الفراخ اللي لونها أحمر، بس الكلام ده مش حقيقي خالص الفراخ الحمرا دي نوع من انواع بهارات التندوري ... التندوري دي طريقة طبخ هندية مبنية على استخدام فرن التندور وهو فرن بيتعمل من الطين وبيبقى عميق جدا درجة حرارته الخفيفة بتبدأ من 300 وشوية وقد تصل لحد 600
طبعا دخل عليه تطوير واشكال حديثة وبقى فيه منه شكل متطور جدا بس فكرة الطبخ التندوري إن الفراخ أو اللحمة بتتبل ببهارات وزبادي وتدخل فرن التندوري ده دقايق تطلع مستوية اخر حاجة
ده مثلا شكل حديث لفرن تندوري من الستانلس ستيل


الخلاصة، دي طريقة لعمل فراخ التندوري بدون فرن التندور طبعا وبدل الفرن بنستخدم الشوي أو التشويح ع النار.. بس الوصفة تستحق التجربة جدا


المقادير
  • نص كيلو صدور دجاج
  • علبة  لبن جوز هند
  • كوب  زبادى
  • معلقة ونص صلصة طماطم
  • بصلتين كبار
  • معلقتين كبار كركم
  • معلقتين كبار كمون
  • 4 فصوص حبهان أو معلقة صغيرة حبهان مطحون
  • 6 فصوص ثوم
  • ملح
  • فلفل أسود
  • زبدة
  • زيت
  • عود قرفة 
  • نص قرن فلفل حامي
الطريقة:
  1. أول حاجة بنعمل الفراخ في تتبيلة وبنسيبها فيها من يوم ليومين، هنخلط كل فصوص التوم مع الزبادي مع بصلاية واحدة في الكبة ونضيف عليهم معلقة واحدة كركم ومعلقة واحدة كمون وملح وفلفل
  2. دي التتبيلة هننقع فيها الفراخ بعد ما نقطعها قطع متوسطة مكعبات او قطع زي ما نحب ونحكم قفل الوعاء ب wrap بلاستيك
  3. قبل الأكل: بنجيب بصلة كبيرة ونقطعها قطع صغيرة ونشوحها في طاسة دقيقة ثم نضيف عليها ملح وفلفل ومعلقة زيت نباتي ونسيبه دقيقتين يدبل بس
  4. نضيف عود قرفة والحبهان ونقلب لحد ما نبدأ نشم ريحة التوابل
  5. ثم نضيف معلقة كركم ومعلقة كمون ونقلب دقيقة لتجانس الخليط
  6. ثم نضيف معلقة ونص معجون صلصة جاهز (مع الصلصة أنا ضفت من عندي رشة سكر بإيدي) ونسيبها شوية تستوي الصلصلة من دقيقتين لاربع دقايق
  7. انا مبحبش الحاجة حراقة فاضفت نص قرن فلفل حامي لان لبن جوز الهند بيطفي الحرارة فبيعمل نكهة حلوة لو بتحب الحراق قوي يبقى ممكن تضيف قرن كامل فلفل حامي أو بودرة فلفل أحمر
  8. لما كله يبقى لونه واحد وضروري منحرقش البصل نضيف علبة لبن جوز الهند ونسيب كل الخليط يغلي على النار شوية
  9. في الوقت ده اطلع الفراخ من التتبيلة واشوح قطع الفراخ على النار بقليل من الزيت (يادوبك تاخد لون بس) أو ممكن نشويها لو قطع الفراخ سميكة كفاية انها تحتمل الحرارة
  10. ثم اضيف الدجاج على خليط لبن جوز الهند ويستوي كله مع بعض 10 دقايق على نار متوسطة

- ممكن نصفي الخليط من البصل وعود القرفة قبل ما نضيف الفراخ للصوص لكن أنا مصيفتوش وعجبني قطع البصل الصغيرة المكرملة
- ممكن كمان للي حابب يضيف بابريكا بس تكون Smoked البابريكا العادية مش هتعمل اي حاجة في الطعم
- جمب الفراخ عملت رز بسمتي بالزعفران والكمون وكان كله على بعضه تحفة من تحف الزمن بالذات صوص الفراخ على الرز
هنا وشفا

Comments

Popular posts from this blog

تيراميسو كلارا - التيراميسو الإيطالي الأصلي

البراوني الأفضل على الإطلاق

دجاج بالترياكي من واجاماما