التتبيلة المميزة لكل أنواع اللحم

دي خلاصة البحث عن تتبيلة لعدد من أنواع اللحم، والخلاصة دي وصلتلها من وصفات كتير وانتهيت بالمقادير دي
التتبيلة دي حققت نجاح مبهر في كل العزومات، واتحدي بيها أي حد يدوقها ومتعجبوش صراحة
اما عن أنواع اللحم اللي جربتها فيها فمشيت تحفة مع الريش ضاني أو بتلو وحتى مع كباب الحلة كانت التتبيلة أكثر من ناجحة، وبالتالي برضه لو عملتها مع شرايح البوفتيك هتبقى ممتازة
نصيحتي بس لو هتعملها مع كباب حلة تقطع قطع اللحم صغيرة عشان تستوي بسرعة وتاخد من التتبيلة
ألذ حاجة في التتبيلة بقى انك ممكن تعملها وتبات فيها اللحمة أو تعملها وتسوي اللحمة فيها في الفرن علطول



المقادير:
  • كوب زيت زيتون أو زيت نباتي
  • نصف كوب صويا صوص
  • ربع كوب وورشستر صوص
  • معلقة صغيرة ملح
  • معلقة صغيرة فلفل
  • بقدونس (اذا مفيش مش هيأثر في التتبيلة كتير)
  • نصف كوب خل
  • معلقتين توم مهروس أو 8 فصوص توم مهروسين
  • ربع كوب ترياكي صوص
  • ربع كوب عسل
  • ربع كوب باربيكيو صوص 
  • معلقة بابريكا مدخنة مش البابريكا العادية
  • عود روزماري
ممكن نزود للي يحب
  • معلقة جنزبيل مبشور
  • ولو عندك بودرة ريحان أو ورق ريحان هيدي ريحة ونكهة حلوة 
جربيها مع نوع اللحمة اللي تحبيه ومفيش مرة هتخذلك :)

Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

الكب كيك الهش بالفانيليا وقطع الشوكولاته