تارت الليمون

دي وصفة التارت الأصلية لأينا جارتن، ممكن نعمل قاعدة التارت دي ونعمل أي حشو نحبه، ممكن كاسترد شوكولاته أو كاسترد سادة أو فواكة أو كاسترد لمون اللي هو بيسموه Lemon Curd وده اللي عملته المرة دي وعليه مارينج وشويته في الفرن
أحسن حاجة في الوصفة دي إنك مش هتشتري أي حاجة ليها، كلها حاجات من التلاجة والمخزن بتاع المطبخ، أما الطعم ففعلا خرافة ومحدش هيقدر يقاوم


فيه افكار كتير للتارت، ممكن نعمله في صينية كبيرة أو نعمل تارت صغير في قوالب الكب كيك.. أو ممكن نستخدم حشو اللمون مع بسكوت بزبدة زي قاعدة التشيز كيك ونستغنى عن الفرن خالص!





المقادير لقاعدة التارت:
  • 125 جرام زبدة أو ١٢ معلقة كبيرة زبدة أو ٣/٤ كوب زبدة ساقعة
  • 1/2 كوب سكر بودرة أو تلات ارباع سكر عادي
  • رشة ملح
  • كوبايتين الا ربع دقيق
  • بيضة

لو عندك بندق او لوز او عين جمل، اي نوع مكسرات من دول لو اتطحن ودخل مع الدقيق بيغير الطعم خالص ويخليه أروع وأحلى
أنا استخدمت لوز مطحون وكملت عليه دقيق لحد ما عمل كوبايتين الاربع

الطريقة:
  1. انعم الزبدة باني اضربها الاول بعدين اضيف السكر واضرب
  2. بعدين اضيف البيضة واضرب ثم الدقيق والملح واضرب
  3. بعد ما تبقى عجين بندخلها التلاجة ترتاح نص ساعة بعدين نطلعها نفردها ونرصها في صينية التارت وتدخل التلاجة تاني 10 دقايق ونسخن الفرن على 150 درجة
  4. بعدين اجيب رز في فويل هتقل بيه التارت وادهن تحت الفويل بزبدة عشان مياخدش طبقة م التارت وانا بشيله
  5. وادخل التارت عليه الرز في الفرن تلت ساعة 150 درجة
  6. اخرج الصينية واشيل الرز واخرم التارت بالشوكة ويدخل 20 دقيقة تانية
وبكدة قاعدة التارت خلاص خلصت تماما



عملت الحشو lemon Curd 
المقادير:
  • 4 لمونات (نص كوب عصير لمون ومعلقة قشر لمون)
  • ٣ بيضات كبار
  • نص معلقة فانيليا
  • ٣/٢  كوب سكر
  • رشة ملح
  • ٦ معالق زبدة


الطريقة:
  1. هنبشر قشر اللمون ونعصر اللمون على القشر ونسخنهم سوا لحد ما يغلوا بعدين نشيلهم من النار
  2. هنضرب البيض مع السكر مع الملح مع الفانيليا ونضيف الخليط ده بالتدريج على خليط اللمون ونقلب أول بأول
  3. نقلب الخليط كله على نار هادية ونفضل نقلب لحد ما يتقل لمدة ٨ دقايق لحد ما يتحول لكسترد أو مهلبية
  4. نرفعه من علي النار ونضيف الزبدة
  5. نقلب الكسترد ونصفيه ونحط عليه (Wrap) بلاستيك ملامس ليه عشان نمنعه يكون قشرة  ونسيبه شوية يهدى
  6. بعد كدة نضيفه على التارت وبالهنا والشفا


المارينج:
هنستعمل بياض 4 بيضات نضربهم ومعاهم رشة ملح وعلى كل بياض بيضه ربع كوب سكر بودرة ونضرب كله لحد ما يبقى شبه الكريم شانتيه ونحطه على التارت وندخله الفرن ونفتح الشوايه بس لحد ما ياخد اللون البني المغري ده :)


Comments

Popular posts from this blog

تيراميسو كلارا - التيراميسو الإيطالي الأصلي

البراوني الأفضل على الإطلاق

دجاج بالترياكي من واجاماما