تشوكليت تشيب كوكيز

حاولت كتير أعمل الـ Chocolate chip cookies ومظبطتش معايا غير بالوصفة دي.. الوصفة دي متجربة والنتيجة فوق الممتازة

المقادير:
  • كوبايتين دقيق
  • 150 جرام زبدة سايحة
  • نص معلقة بيكنج صودا (مش بيكنج باودر وفيه فرق ضخم بين الاتنين مينفعش حاجة تحل محل التانية)
  • نص معلقة ملح
  • بيضة ساقعة
  • صفار بيضة ساقعة برضه
  • تشوكليت تشيب (انا استخدمت بتاعة هيرشي)
  • 2/3 كوب سكر بني
  • نص كوب سكر بودرة
  • معلقتين فانيليا

الطريقة:
  1. أول حاجة هضرب الزبدة السايحة مع السكر البني والبودرة لحد ما يدوبو خالص
  2. اضيف البيضة وصفار البيضة والفانيليا عليهم واقلب كله مع بعضه
  3. اخلط الدقيق بالبيكنج صودا والملح واضيف الدقيق بشكل تدريجي على الخليط شوية بشوية واقلب لحد ما كله يختلط
  4. اضيف التشوكليت تشيب واقلب بسيط عشان بس تتوزع
  5. بعدين اجيب صواني الفرن الكمية دي عملت صينيتين واحط فيهم ورق زبدة وأبدأ أكور العجين واحط الكور بشكل متراص بعيد عن بعض عشان الحجم بيزيد
  6. ادخل الصواني في الفرن على حرارة 170 لمدة 15 - 18 دقيقة لحد ما الحواف تحمر بسيط وأطلعها
فيه ناس بتحط الخليط في التلاجة ساعتين قبل ما يدخل الفرن عشان يبقى الكوكيز طري من النص بس بالوصفة دي الكوكيز طلع طري ومقرمش من الحروف بشكل ممتاز
الطعم تحفة.. انا كمان زودت بدل معلقة دقيق معلقة كاكاو عشان تطلع لونها بني فاتح خفيف وطلعت فوق الممتازة

Comments

Popular posts from this blog

تيراميسو كلارا - التيراميسو الإيطالي الأصلي

البراوني الأفضل على الإطلاق

دجاج بالترياكي من واجاماما