كيكة بودنج الليمون الهشة

أحلى حاجة حلوة اللي بتبقى مكوناتها بسيطة جدا وكلها موجودة في البيت.. ولما تبقى الحاجة الحلوة فيها مزازة اللمون مع سكر بتبقى تحفة.. للي مبيحبش حاجة مسكرة اوي وبيحب اللمون دي احلى كيكة بودنج لمون ممكن تاكلها.. الطعم تحفة وسهلة جدا.. تقريبا صعب تبوظ من كتر بساطتها.. يعني لو اتفاجئتي بضيوف ممكن قبل ما ييجو بساعة واحدة تبقي جاهزة بيها :)



المقادير:
  • تلتين كوب سكر بودرة
  • ربع كوب دقيق
  • رشة ملح
  • 2 بيض
  • تلتين كوب لبن
  • معلقة خل أو معلقة لمون
  • معلقتين كبار عصير لمون
  • معلقة كبيرة بشر لمون


الطريقة:
  1. أول حاجة بنعمل حاجة اسمها Buttermilk ودي يعني بنكتل اللبن ونخليه في صورة شبه الزبادي شوية.. هنجيب تلتين كوب اللبن ونحط عليها معلقة لمون أو معلقة خل ونسيبها لمدة 10 دقايق بتتحول لـ Buttermilk
  2. نبدأ في الوعاء اللي هنشتغل فيه نفصل صفار البيض عن بياضه.. ونضرب صفار البيض مع عصير اللمون مع بشر اللمون مع الـ Buttermilk اللي عملناه
  3. نضيف بعد كدة على الخليط الدقيق والسكر والملح بطريقة النخل ونقلب
  4. نضرب بياض البيض لوحده لحد ما تبان رغاوي او فقاقيع وبعدين نضيف رشة ملح ونكمل ضرب لحد ما يبقى مارينج متماسك
  5. نضيف المارينج على الخليط اللي فيه صفار البيض والدقيق ونقلب بهدوء مجرد نمزج الخليطين في بعض عشان منضيعش الهوا اللي موجود جوا المارينج
  6. بعد ما يختلط تماما المزيج نوزعه في قوالب كب كيك او قوالب بأي شكل نحبه بس نكون داهنينها زبدة ورشة سكر عشان تدي لون وكرملة ونرص القوالب دي في صينية ونحط فيها مياه (حمام مياه)
  7. ندخل القوالب الفرن على حرارة 160 لمدة ساعة الا ربع
اللي هيحصل ان الهوا في المارينج هيطلع فوق وبودنج اللمون هينزل تحت فلما نطلعها من الفرن ونقلبها هيبقى البودنج فوق على طبقة من الكيكة الهشة
الطعم رهيب
ممكن نقدم جمبها اي نوع فاكهة، أو صوص شيكولاتة بيضا أو رشة سكر بودرة


Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

الكب كيك الهش بالفانيليا وقطع الشوكولاته