كب كيك الجنزبيل والعسل الأسود

صحيح الحاجة الحلوة المثالية بالنسبالي اللي فيها شيكولاتة.. بس برضه الواحد ممكن يغير شوية ونعمل حاجات حلوة بنكهات مختلفة.. الجنزبيل والعسل الأسود ريحتهم تجنن والحاجة الحلوة بيهم بتطلع تحفة



المقادير:
  • 3 ونص كوب دقيق
  • 2 معلقة صغيرة بيكنج صودا.. ومينفعش نبدلها ببكينج باودر كل حاجة منهم بتتفاعل مع مواد معينة
  • معلقة صغيرة ملح
  • نص معلقة صغيرة قرنفل مطحون
  • نص معلقة صغيرة حبهان مطحون
  • نص معلقة صغيرة قرفة
  • نص معلقة صغيرة جنزبيل مطحون
  • كوب سكر
  • 2/3 كوب عسل أسود
  • نص كوب جنزبيل طازة مبشور
  • بيضاية كبيرة او بيضتين صغيرتين
  • كوب زبدة دايبة (انا بدوب الزبدة في الميكروويف)
  • تلت كوب مياه دافيه


الطريقة:
  1. في وعاء نخلط الدقيق مع البيكنج صودا والملح والقرنفل والحبهان والقرفة والجنزبيل مع بعض ونسيبها على جمب
  2. في وعاء اخر هنخلط كوب السكر مع العسل الأسود مع الجنزبيل الطازة المبشور ونقلب
  3. نضيف البيض ونضرب بالمضرب
  4. نضيف الزبدة على الخليط ونضرب
  5. نضيف تلت كوب ماء ساخن ونقلب
  6. نضيف بعد كدة خليط المواد الجافة ونقلب بالسباتولا لحد ما يمتزج كله مع بعضه
  7. نوزع الخليط على صينية الكب كيك
  8. وتدخل الفرن 180 درجة لمدة 20 دقيقة

وهتشم أحلى حاجة حلوة في الكون بريحة الجنزبيل والعسل الأسود
ممكن تتزين بكريم شانتيه.. بس انا بالنسبالي عمر ما الكب كيك فضل لحد ما ألحق أزينه.. بيتنسف

Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

الكب كيك الهش بالفانيليا وقطع الشوكولاته