البراوني الأفضل على الإطلاق

أفضل براوني شيكولاتة من ملوك الشيكولاتة هيرشي بكل التكات والحركات وملحوظات زيادة كمان



المقادير:
  • نص كوب كاكاو هيرشي خام (الوصفة كانت بـ ٣/٤ كوب كاكاو بس الطعم كان شديد قوي فيستحسن نقلل شوية للنص أو الربع كمان)
  • نص معلقة بيكنج صودا
  • ٣/٢ كوب زبدة سايحة أو سمنة
  • نص كوب مية مغلية
  • كوبايتين سكر
  • ٢ بيضة
  • ١ و٣/١ كوب دقيق
  • معلقة فانيليا
  • ربع معلقة ملح


(ممكن بدل نص كوب مية مغلية تبقى نص كوب نسكافيه سخن هتدي طعم أحلي ومختلف، وممكن نزود زينة على مزاجنا زي بريتزل مالح مثلا للوش أو فروستنج، وممكن نزود بندق جوا البراوني وممكن نزود قطع شوكولاته)

الطريقة:
  1. نسخن الفرن على ١٨٠ درجة وندهن صينية الخبز زبدة عشان نسهل عملية اخراج البراوني من الصينية
  2. هنقلب سوا الكاكاو والبيكنج صودا ونضيف عليهم نص كمية الزبدة
  3. نضيف المية المغلية ونقلب كل الخليط مع بعض
  4. نضيف السكر والبيض وباقي الزبدة سوا لحد ما كله يتجانس مع بعضه
  5. نضيف الدقيق والفانيليا والملح ونقلب كويس
  6. نصب كل الخليط في صينية الخبز ويدخل الفرن لمدة ٣٥ - ٤٠ دقيقة


* لو عايزين نحط ع الوش بريتزل مالح يبقى نحط البريتزل صغير في قعر الصينية قبل الخبز ونصب عليه خليط البراوني ولما يخلص نقلبه هيبقى تحفة

* لو عايزين نعمل فروستنج للبراوني: نخلط ٦ معالق زبدة عليهم كوبايتين سكر بودرة وربع كوب كاكاو مع نص كوب لبن ونضرب كله لحد ما نعمل القوام اللي احنا عايزينه ونضيف عليها فانيليا

Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

دونتس دانكن دونتس