دجاج بالخوخ

ترددت كتير جدا قبل ما أجرب الطبق ده لإني مكنتش مقتنعة إن ممكن نعمل فراخ بالخوخ! وتطلع حلوة!! بس الطعم والطبق كان مفاجأة كبيرة بالنسبالي ولزوجي كمان.. عجبنا جدا وطلع طبق حادق ممتاز بنكهة وطعم أكتر من تحفة. أحلى حاجة فيه بقى إن كله سهل جدااااا



المقادير:
  • بصلة كبيرة مقطعة صغير
  • معلقتين كبار خل
  • فصين توم مفرومين
  • أوراك فراخ (٤ أوراك فراخ أنا استخدمت الورك بدون الدبوس.. والسبب في ده إن الورك بيستوي كويس جدا وبياخد من نكهة الصوص بعكس الصدر ممكن يستوي بزيادة ويبقى مطاطي الطعم لو استوى زيادة)
  • معلقتين كبار وورشستر صوص
  • صوص حار (الأكلة مش حراقة خالص الصوص الحار بيدي طعم بس ومش بيخليها حراقة لو عايزينها حراقة ممكن تزودوا شطة أو فلفل أحمر)
  • ٤ معالق كبار صوص باربكيو أي نوع (أرخص نوع هيطلع ممتاز مع باقي النكهات)
  • علبة خوخ كمبوت (أو ممكن نستبدلها ببرطمان صغير مربى خوخ، أو ممكن خوخ فريش)
  • زيت نباتي ومعلقة زبدة


الطريقة:
  1. ننشف الفراخ بمنديل عشان تتبل بالملح والفلفل (عادة المية أو البلل بيخلي التتبيل يقع من الفراخ)
  2. نسخن الزبدة وعليها الزيت ع النار ونحمر قطع الفراخ بحيث إن الجلد يبقي هو اللي بيتحمر
  3. لما تاخد الفراخ اللون مظبوط بنطلعها في طبق ونشيل نص كمية الدهون من الحلة
  4. نحط البصل المتقطع ونشوحه بسيط وبعدين ننزل بالخل ونعلي النار قوي عشان يتبخر ونقلب كل اللي في الحلة عشان كل بقايا الفراخ ونكهتها تدخل في البصل
  5. نضيف الباربكيو صوص وعليها الوورشستر صوص والصوص الحار وقطع الخوخ نفسها و٣ معالق من الشراب المسكر اللي جوا الكمبوت ونص كوب مياه ونضيف عليهم التوم ونقلب
  6. أول ما تبدأ تغلي نرجع تاني قطع الفراخ جوا الحلة ونوطي النار خالص ونغطيها ونسيبها ساعة بحالها تستوي


للي يحب ممكن اضافة شطة أو فلفل حار هتخلي الأكلة أحلى وأحلى

عملت جنبها بطاطس بيوريه وسلطة وكان الأكل كله خفيف ورائع

Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

دونتس دانكن دونتس