كيكة الجزر بالأناناس

ببساطة الكيكة دي فعلا تهبل.. طعمها تحفة ورائع ومغذية
المفروض الكيكة بتتعمل بكوبايتين سكر بس أنا استبدلت الكوب التاني بكوب سيرب من كمبوت الأناناس



المقادير:
  • كوب وتلت زيت نباتي
  • كوب سكر
  • كوب المية المسكرة اللي منقوع فيها كمبوت الأناناس وإلا يتم استبدالها بكوب سكر آخر
  • ٣ بيضات كبار في درجة حرارة الغرفة
  • معلقة فانيليا
  • ٢ كوب ونص دقيق
  • ٢ معلقة بيكنج صودا
  • رشة ملح
  • معلقة قرفة صغيرة
  • خمس جزرات (نص كيلو) متقشرين ومبشورين
  • أناناس مقطع قطع صغيرة (كمبوت أناناس أي نوع)
  • عين جمل، أو زبيب أو أي نوع مكسرات للي يحب


الطريقة:
  1. هنسخن الفرن على ١٦٠
  2. هنحضر صينية مدهونة زيت ومرشوشة دقيق 
  3. أول حاجة نبدأ بالسكر وسيرب الأناناس والزيت والبيض وعليه معلقة فانيليا كله يتضرب مع بعض جامد لحد ما الخليط يبقى لونه فاتح
  4. نخلط سوا المواد الجافة في وعاء لوحدها.. ننخل الدقيق عليه البيكنج صودا عليه القرفة ورشة الملح
  5. نضيف كل المواد الجافة على خليط البيض والزيت والسكر ونقلب
  6. في وعاء منفصل نخلط الجزر المبشور مع قطع الأناناس وأي نوع مكسرات عليهم معلقتين دقيق (الخطوة دي عشان الحشو ده ميسقطش جوا الكيكة ويتحرق من تحت)
  7. ونضيف الجزر والأناناس على مزيج الكيك ونقلب بسيط بإيدنا ونصب الخليط في الصينية وعلى الفرن
  8. بتاخد في الفرن من ساعة إلا ربع لساعة أو ما تعلى ويحمر الوش شوفي بخلة أو عود خشب استوت أو لا وخرجيها ترتاح


أنا كمان عملتلها فروستنج سهل جدا
حطيت ٥ مكعبات كيري عليهم علبة لبن مكثف محلى ومعلقتين كريم شانتيه ومعلقة سكر بودرة وباقي سيرب الأناناس وقلبت كله مع بعض وحطيته في التلاجة يسقع ودهنت الفروستنج بين الكيك وعلى الوش وزينتها بالأناناس

Comments

Popular posts from this blog

تيراميسو كلارا - التيراميسو الإيطالي الأصلي

دجاج بالترياكي من واجاماما

الكب كيك الهش بالفانيليا وقطع الشوكولاته